「唔～好～呀！要大家擔心真的不好意思，但假如你的同事受襲，你本能也會衝出去捉拿施襲者！可惜，骨頭硬不過鐵棍。在此再衷心感謝大家的關心，也謝謝醫護人員、警方、家人、朋友、同事們的照顧和祝福！頭穿了，手甩骹，但心暖！謝謝大家！」當奴在1時01分，在IG貼OK手勢報平安。 據警方調查後，懷疑當奴遇襲事件涉及一名的士司機，警方初步指事發前當奴與兩名友人在聯發茶餐廳晚膳，突有一名的士司機駕車來到，其間有人持硬物闖入茶餐廳，聲稱要找當奴，其後當奴遇襲受傷，至於該名的士司機事後離去。警方正展開調查，案件列傷人案跟進。 不過當奴的版本，「但假如你的同事受襲，你本能也會衝出去捉拿施襲者！」似是另有內情。 昨晚同行的另一名傷者Jacky方才在醫院接受訪問時，其事發經過版本如下:當時當奴等一行四人於食肆食緊嘢，一男子突然闖入店中，一拳打落Jacky面上，Jacky馬上報警，施襲男子即衝出店外，當奴出門口追，此時該男子在的士後尾廂取出棒狀物體追打當奴，擊中當奴頭部，血流如注，幸當時有一休班救護員經過，即為其急救。Jacky表示不認識施襲男子，交由警方跟進，暫亦未知當奴傷勢。

【短片】【當奴遇襲】當奴「OK」報平安：同事受襲捉拿施襲者受傷

MKPop組合Faith鄧鈞耀（Dawn），因為私自接Job、失場同經常Post半裸照喺社交網站，以影響樂團形象為理由而被Out。佢日前接受《蘋果》訪問，佢逐點反駁舊公司。 講到話佢影私相而破壞形象，Dawn引用一個例子話：「大約幾個月前公司叫我去做一個電影Casting，個導演係雲翔，佢拍好多有關性嘅三級片，咁老闆安排咗我去，我去到導演話套戲需要我全裸，連Casting時已經要全裸，我自己接受唔到，老闆有話過同導演傾吓可唔可以唔使全裸，但導演堅持，最後我推咗。我想講嘅係既然老闆叫得我去Casting都預咗我有機會拍全裸嘅戲，咁憑咩話我Post相係破壞形象、教壞小朋友呢？」 Dawn話舊年4月同公司簽約5年，依家被雪藏，覺得好無奈。咁日後打算點？佢話:「我有同公司聯絡過，問打算點處理我哋嘅合約，佢哋話會搵律師同我傾，但暫時都未有進一步消息。」會唔會覺得中咗伏，有無後悔簽約？佢話：「咁又無，過去一年其實過得幾精采，又出咗唱片，又喺新城度攞過獎，都係人生里程碑，所以無後悔嘅。」

【Casting都要全裸】Dawn@Faith貼半裸就叫「影響形象」？

今個星期日就係父親節，已為三子女爸爸嘅王敏德（Michael），噚晚就同老婆馬詩慧（Janet）大女王曼喜（Kayla）、二女王麗嘉、囝囝王躍穎提早慶祝。 大女王曼喜（Kayla）噚晚就喺Instagram晒全家福，留言：「HappyearlyFather'sDay！」Michael亦有上載照片，留言：「WithmygirlsforearlyFather'sDaydinner！」左擁右抱兩位亭亭玉立嘅囡囡，Michael一臉幸福樣子。

王敏德左擁右抱攬兩囡慶祝父親節

凌晨十二點九左右，少爺占離開商台，大批傳媒即追訪。問他可知當奴情況？他稱:「我依家去醫院搵佢。」可知其情況？「OK嘅依家，要留醫，不過我未知佢傷勢。」 雖然少爺占頭先喺節目中代戰友報平安，又指不是傳聞中有刀，但方才少爺占受訪時就明顯有保留，謂自己不在事發現場，不知情況，面上也明顯沒有表情。 可會猜測是節目開咪期間「得罪人」招尋仇？少爺占指:「應該唔會，應該係另外一啲原因，等佢再同大家交代。」言下之意即是知道行兇原因？「我哋猜測緊係嗰個原因。」可擔心其他同事及自身安全？少爺占稱:「自己小心啲囉，你知我哋做呢行都冇得擔心。」又表示牽涉「商業嘅嘢」。

【短片】【當奴遇襲】唔係點錯相？少爺占暗示知當奴遇襲原因：商業嘅嘢

好耐無見嘅陳妙瑛，今日喺灣仔伊館，同埋羅霖、琦琦等出席髮型化妝比賽嘅頒獎禮，陳妙瑛話今日專程嚟陪佢生意拍檔攞獎。 正所謂「十年人事邵音音」，想當年即係14年前，再即係2002年大台嗰套《無頭東宮》，同佢合作嘅向海嵐早排出席活動，成個人唔同晒個下巴仔唔見咗，而陳妙瑛呢...佢都唔同咗㗎，面色紅潤，仲脹卜卜o添！ 講到近況，陳妙瑛話：「最近忙化妝學校同乳酪、朱古力店生意，同埋調理身體。」點解要調理身體呢？原來佢自爆十幾年前幫大台做慈善騷，演出一個爆破嘅環節後受傷，佢話：「當時喺個箱入面，擺左二百磅炸藥，炸咗二千磅力出嚟，可能冇咁嘅預備，雖然有戴耳塞，耳膜無事，不過可能因為咁震到內傷，由嗰日開始每日都周身痛。」 陳妙瑛話原本當年大會叫佢著泳衣落水捉八爪魚：「但係我真係唔想著泳衣，所以寧願要玩高難度啲，但係我無後悔做呢個表演。」除此之外，陳妙瑛又話頸椎近年生咗七節骨刺，幸好呢幾年搵中醫治療，有信心一年內可根治問題完全斷尾。 同場嘅羅霖就話自己啱啱去完日本旅行返嚟：「同大仔、細仔去咗五日，做咗五陪，陪食、陪玩、陪Shopping、陪俾錢同陪瞓，不過係開心嘅。」羅霖又話因為忙緊17號自己代理嘅洋酒活動，全個旅程都忙住請嘉賓，成日機不離手，搞到差啲俾車撞親：「有日過馬路明明見到係綠燈，行到出去無諗到仲有車轉灣，好彩車速好慢，細仔即刻拉住我，叫我唔好用電話住，我都即刻同佢講唔好學我。」

【短片】【《無頭東宮》14年後】西宮向海嵐尖下巴變圓
東宮陳妙瑛蘋果肌脹卜卜

韓國上位女團TWICE嘅日本成員Sana早前被影到扶起跌倒粉絲，被讚暖心後，上周六另一日本成員Momo演出時就被粉絲大讚專業，就算甩衫都依照面露微笑，堅持完成演出。 上周六TWICE舉行見面會會粉絲，當日除咗為粉絲簽名外更表演出道曲《LikeOoh-Ahh》，令粉絲尖叫聲不斷。網上流傳一段當日TWICE表演《LikeOoh-Ahh》時嘅片段，成員Momo身穿黑色短身上衣加牛仔外套，再配上短褲，大騷好身材。不過未知係咪件衫綁得唔夠實，喺Momo跳跳吓舞時突然鬆咗，喺舞蹈動作下件衫仲Fing嚟Fing去，更露出黑色打底衫。 突然發生咁嘅事令Momo都堂皇咗幾秒，不過佢並冇要求停音樂，待件衫整返好先再表演，而係用一隻手拉住件衫就繼續表演。雖然同團台灣籍成員周子瑜有打算幫佢整返好，但都係整唔切。而且Momo並冇因為甩衫而表現得尷尬、慌張，仲一直保持微笑，而舞蹈動作更不減力度，直到表演完畢先喺成員嘅幫忙下整返好件衫。而片段立即引起粉絲同網民嘅關注，紛紛留言大讚Momo夠專業同冷靜。

【韓流】夠專業！Momo@TWICE跳到甩衫都唔叫停

荷李活影星尊尼狄普（JohnnyDepp）日前被妻子安芭赫德（AmberHeard）單方面申請離婚，又於法庭上指控尊尼家暴，向法庭申請暫時禁制令，禁止尊尼埋身。此案將於本星期五開庭，但未知兩者會否親自出庭。 目前仍在巴哈馬小島度假的尊尼，日前派人去他與安芭位於洛杉磯嘅住所，執個人物品離開，不過唔知尊尼係咪玩嘢，竟然將傢俱等都要搬走。由於法官指尊尼只可以將直至周五出庭為止所需要用嘅衣物、必需品帶走，所以安芭團隊立即報警，指尊尼違反禁制令條件。 警方到場示意尊尼方面不可將書枱帶走，將兩方爭執調停後便離開。

【係咪玩嘢？】尊尼狄普派人去安芭家執私人物品搬埋傢俬走

陳豪同陳茵媺前日結婚3周年，結婚3年生3個都仲咁sweet，喺微博post咗張飲珍珠奶茶嘅相，仲話：「同皇上抽了幾個鐘去飲嘢！」皇上係邊個？睇嚟就係陳豪嘞（同朕check下...)！ 不過好景不常，昨日傍晚時份，Aimee再喺微博再開post話：「39 degrees...Being sick is not fun. 兩個王子病咗成個星期...照顧佢哋好返之後，而家到我啦。」張相Aimee貼住退熱貼，仲一臉病容咁，真係陰功豬喇！

同陳豪賀結婚3周年　陳茵媺發燒慘慘豬

姚子羚日前於晚上約7時許，與幾位攝製隊同事現身元創坊，並選了間食點心的中餐廳進餐。眾人坐下後，姚子羚就不停調位，調了三次之後，最後選坐露天位置。眾人坐下便各自玩手機，似互不相識，隨後她拿出紙筆，抄寫手機內的資料，就算食物到了，依然未停過手，最後她是左手拿着電話，右手拿起筷子食麵，始終沒一刻放下手機。 採訪、攝影：徐錦池、畢紹基、吳耀輝

當年今日