頭兩場雖然都係熱門天下，但對於雷神粉絲嚟講，偶像呢兩場之座騎選擇，卻令佢哋有啲疑惑。 雷神頭場棄騎「人民武士」由巫斯義接手勝出，半粒鐘之後，第二場五班千四米，佢唔騎近兩仗由自己拎一冠一季之「齊齊健康」，結果呢匹東廐馬用新配搭何澤堯，亦被捧成5.8倍次熱門，並且後上衝贏3.5倍大熱門「威祥」，取得服役第二捷，第一口孖寶由一對雷神棄騎馬包辦。 此場6歲孫廐馬「威祥」直路中段已經突圍而出，諗住十拿九穩贏得之際，奈何3歲「齊齊健康」年輕力壯，早段第三位，直路初一席略墮退，但牠回到氣，拉士將「威祥」冚過番影相贏埋，孫達志只能怪自己冇運，頭馬維持九場單位數，繼續敬陪末席。今場季軍是全場最老之「雙龍出海」，此駒已屆十歲，季後必須退役，近排隔紗上名，爛船尚有三斤釘。而雷神揀騎「無敵劍俠」惹到唔少飛，呢匹苗廐馬衝落唔多，只得第四名。 賽後見單車手牛下女車神李慧詩拉頭馬，原來她這天將代表體育界別，獲頒太子珠寶鐘錶精英獎，獲表揚在體育界的成就。

雷神連場揀錯馬！牛下女車神現身凱旋門

身在英國的練馬師大摩，起用連達文策第五場四班1400米的「勇士勁」，爆出42倍大冷win，首次與連達文合作贏馬。馬主勇士團體成員之一Catley,WilliamMichael賽後表示，此駒過往在馬群內競跑情緒相當緊張，幸好大摩對症下藥，申請為牠初戴眼罩出賽，果然完全改變了，走勢較前穩定並勝出。 William又表示連達文發揮出色，「勇士勁」排12檔亦能順利埋欄競跑，自造步速，入直路再發力拋離對手，贏馬應記一功。不過「勇士勁」賽後將提早唞暑，待來季4歲成熟進步才再上陣。

馬主：一件物件令牠完全改變了！

今午沙田日馬重頭戲係第八場太子珠寶鐘錶精英盃，贊助商搵咗一大批嘉賓到場助興，並頒發第六屆「太子珠寶鐘錶精英獎」，得獎者包括於經典劇集「大時代」飾演主角丁蟹之鄭少秋、近年單飛發展搵到盆滿缽滿之阿Sa蔡綽妍、人氣歌手軒仔張敬軒及「牛下女車神」李慧詩，代表電視、電影、歌唱及體育界別。 除咗上述四人，其他嘉賓包括「陸叔」陳永陸、吳孟達、李丞責等人，最受歡迎當然係秋官啦，佢做足本份，滿場飛「被捕獲」，周圍同人騷騷，逢人嗌佢合照亦來者不拒，搞到場面鬼咁熱鬧，秋官魅力果然有番咁上下！

馬場倒瀉籮「蟹」！秋官攞獎狂被捕獲

第二場賽事五班1400米，末段出現三駒鬥法的情況，柏寶座騎「雙龍出海」、何澤堯座騎「齊齊健康」及潘頓座騎「威祥」齊齊透出，最終「新華將一哥」何澤堯擊敗了兩位澳洲大師傅，替「齊齊健康」補中，「威祥」及「雙龍出海」分列二、三，至於「無敵劍俠」則跑獲殿。無巧不成話，今日的第一口孖寶，均由雷神棄騎包辦，不知餘下場次會否有這個情況出現呢？

當年今日