以前聽見同學仔一家人暑假跟團去佬沃旅行，其時都仲未知佬沃喺邊！現在去佬沃的熱潮已退減，無辦法啦，當地血拼戰場少，唔合乎香港人旅遊價值觀，旅行社又無油水，旅行團越來越少，或轉變為自遊行主導。不過，香港無直航佬沃航班，要先到馬尼拉再轉機，明明只係一個鐘多少少嘅機程一下子變為3個幾鐘，仲未計轉機等候時間，感覺笨豬豬。趁暑假檔期，旅行社開包機直飛，當然立即飛去睇睇啦。

菲律賓早於十六世紀已開始一段西班牙殖民地歷史，國名亦自當時西班牙國王FelipeII而來。本島北部面臨南中國海，正好作為當時西班牙海上貿易的中轉站，因而繁盛一時，特別是維干（Vigan）古城。維干古城距佬沃市約1.5小時車程。古城自1993年已被登錄入聯合國教科文組織世界文化遺產名冊，老街兩旁保留了殖民地時代的房屋，外牆雖斑駁陳舊，仍可見西班牙式建築風格，圓柱與拱廊，牆身都塗上淺淡鮮色。另一最能代表西班牙建築風格的是庭園，是在羅馬建築基礎上摻雜北非摩爾人風格。講得抽象？其實一睇淡黃加藍色花紋的地磚就認得出，前總統Elpidio的大宅SyquiaMansion便是最佳的示範單位。

a.SyquiaMansionMuseum 門票：$3.5 地址：QuirinoBoulevard,Vigan

老街街頭，佇立着一個女石像，正正在我們午餐所到的CafeLeona。石像中人正是當地偉大女詩人LeonaFlorentino，生於西班牙殖民時期的十九世紀，憑一手好詩得國際間的認同，短短36年的生命已成為菲律賓的傳奇。CafeLeona沒有欺世盜名啦，餐廳正是Leona故居，老房逾200歲老而彌堅，仲可改建成餐廳。餐廳當然是賣菲律賓菜，Bagnet是每餐必備，咩嚟？炸豬肉呀！豬味濃，皮極脆，配白飯一流！臨尾唔少得一定是HaloHalo，即是雪糕配上各種豆、刨冰、煉奶等雜不冷配料，家家用料稍有不同，在外邊40℃天時下是最佳的消暑品。

b.CafeLeona 地址：MenaCrisologoSt,Vigan

既是遊客區，古城大街兩旁當然開滿店舖，不過不是售賣一式一樣量產型手信，而以手作工藝居多，特別是木器，木凳木枱一大堆，手工較參差，但細心挑選還是可以執到好嘢。 Lucy's是門面較大的，門前木器、手作飾物打頭陣，深入店內還放了大堆神像，有耶穌也有聖母，木雕石雕的，原來是Lucy的朋友放在此寄賣，亦有的是從當地民居搜集得來，閒閒地都三四十年歷史，個個表情十足，擺埋一齊濟濟一堂似博物館展廳。木器以外，街上還有賣藤織手袋，較平時的挺身，塞幾多嘢入去都能維持堅挺袋形，是個藤織輕巧版手提篋，好實用。 大街上除了血拼，我更愛坐在老木頭做的椅子上，看馬車在路上來回，馬蹄踏地咯咯作響，卻揚不起煙塵，老調縈繞夕陽西下的老街，似四百年不變。

c.Lucy'sAntiqueShop 地址：14CrisologoStreet,HeritageVillage,Vigan

溫馨提示：古城地道小食Bibingka，外形似葡撻但有濃郁椰香，必試！

特區護照或BNO可享7天免簽證入境。查詢：28238500（菲律賓領事館） 菲律賓佬沃4-5天團，遊覽馬可斯行宮、抱威教堂、省國立博物館，逢星期四及日出發直飛佬沃，團費$1,699起。查詢：21088888（康泰旅行社） 1港元約兌5.96披索 （文中價錢已折算港元） 220V，兩扁腳插座

菲律賓　佬沃 下周間中有雨 24-35℃

當年今日